Përgjegjësja e Çështjeve Shoqërore, në paraburgimin e Vlorës, Fjona Cenodemaj, ka kallëzuar zv/drejtorin e institucionit në fjalë, Gentian Manellarin, për korrupsion.
Punonjësja ka hedhur akuza të rënda për z.Manellari ndërsa pohon se ky i fundit i ka kërkuar një shifër afro 10 mijë euro që të bënte të mundur që ajo të qëndronte në pozicionin që ishte.
Në kallëzimin e saj, Cenodemaj, është shprehur se në datën 10 të muajit Nëntor kanë qenë në një lokal në afërsi të fshatit Nartë në shoqërinë e farmacistit të institucionit Dritan Fejza dhe në një moment sipas saj i kallëzuari i ka thënë “më jep mua 10.000 euro që të qëndrosh aty ku je”.
Sipas saj nuk i kishte kushtuar shumë vëmendje kësaj kërkese por 3 ditë më pas i është komunikuar zbritja në detyrë, nga drejtuese në specialiste, ndërkohë që i është përgjigjur në mbledhjen ku ishte i pranishëm dhe drejtori i Institucionit Edi Leka, se paska qenë e vërtetë kërkesa se duhet të paguante për të qëndruar në vendin e punës.
Ajo është shprehur se ndihet në presion dhe trysni ndërsa ka insistuar që të merren kamerat e lokalit, që është në afërsi të Nartës si dhe të pyetet dëshmitari i cili është farmacisti i institucionit.
Sipas burimeve, farmacisti është marrë në pyetje por nuk dihet çfarë ka deklaruar.
